ვასილ გულისაშვილის სატყეო ინსტიტუტი
დაარსდა 1945 წელს, ცნობილი ქართველი მეტყევე - მეცნიერის ვასილ გულისაშვილის თაოსნობით. ინსტიტუტი მუშაობს სატყეო სფეროში ფუნდამენტური თეორიული, ექსპერიმენტული და გამოყენებითი კვლევების განხორციელების კუთხით. ინსტიტუტი აგრეთვე ახორციელებს საკონსულტაციო და საექსპერტო საქმიანობას. შესწავლილია და დღესაც მიმდინარეობს კვლევები ტყეების გენეზისის, ზრდის, ფორმირების ხასიათის და მათი სხვა ფაქტორებთან (ნიადაგი, წყალი, სითბო) დამოკიდებულების, აგრეთვე ტყეების სოციალური და ეკოლოგიური თვისებების, ტყის რესურსების ინვენტარიზაციის და ლანდშაფტურ-ეკოლოგიურ საფუძველზე მართვის დაგეგმვის, ტყის რესურსების კვლავ წარმოების (აღდგენის), დაცვისა და მათი გამოყენების კუთხით.
ინსტიტუტის მიერ შემუშავებულია ამჟამად საქართველოს სატყეო დარგში მოქმედი მეთოდოლოგიები და ინსტრუქციები, მათ შორის ტყეების ინვენტარიზაციის, სატყეო სამეურნეო საქმიანობების დაგეგმარების ნორმატიული მასალები, აგრეთვე ტყის შემქმნელი ძირითადი მერქნიანი სახეობების ზრდის მსვლელობისა და აღნაგობის ცხრილები და სხვა.
საქართველოს ტყეების კონსერვაციისა და მრავალმიზნობრივი ტყის მართვის მიზნების შესაბამისად გაძლიერებულ უნდა იყოს შემდეგი მიმართულებები:
- საქართველოს მთის ტყეების ეკოსისტემების მართვის დაგეგმვისათვის ლანდშაფტურ-ეკოლოგიური საფუძვლები;
- კორომებში დეპონირებული ატმოსფერული (C-CO2) მარაგების დადგენა;
- ტყის ინვენტარიზაციის არსებული სახელმძღვანელო პრინციპების გაუმჯობესება ტყის მრავალმიზნობრივი მართვის თანამედროვე მოთხოვნებიდან გამომდინარე;
- საქართველოს სახელმწიფო ტყის ფონდში არსებული საძოვრების რაციონალური სარგებლობის მეცნიერული საფუძვლების შემუშავება;
- ტურიზმისა და ეკოტურიზმის მართვის მეცნიერული საფუძვლები სატყეო მეურნეობაში;
- ბიომრავალფეროვნების (ტყის რესურსების) სახელმწიფო მონიტორინგის სისტემის სამეცნიერო საფუძვლები;
- ტყის მავნებელ - დაავადებათა მონიტორინგის სისტემის სამეცნიერო საფუძვლები. მავნე მწერების გავრცელების პროგნოზირების საფუძვლები;
- მავნე მწერების წინაამღდეგ ბრძოლის ეკოლოგიურად უსაფრთხო ტექნოლოგიების შემუშავება - დანერგვა;
- ტყეების კონსერვაციისა და რაციონალური (მდგრადი) მართვის გლობალური პრობლემები;
- სუბალპური ტყეების ბუნებრივ ზედა ზღვრამდე აწევის ტექნოლოგიური პროცესების მეცნიერული საფუძვლების შემუშავება;
- მინდორსაცავი ტყის ზოლების ეფექტიანობის ამაღლების მეცნიერული საფუძვლები;
- დაცვითი ფუნქციადაკარგული (დეგრადირებული) ტყის ზოლების სტრუქტურების კორექტირება და მერქნიან მცენარეთა სახეობების ასორტიმენტის შერჩევის მეცნიერული საფუძვლების შემუშავება.
ინსტიტუტის ერთ-ერთი მთავარი სტრატეგიული მიმართულება პარტნიორული კონტაქტების დამყარებაა, როგორც საქართველოს, ასევე საზღვარგარეთის ქვეყნების შესაბამის ორგანიზაციებთან. სამეცნიერო ინფორმაციის გაცვლის დარგში ინსტიტუტს კავშირი აქვს დამყარებული უკრაინის, ლიტვის, ფინეთის, ნორვეგიის, გერმანიის, შვეციის, სლოვაკეთის, აზერბაიჯანის, რუსეთის, სომხეთის და შვეიცარიის შესაბამის ინსტიტუტებთან.
ინსტიტუტში ფუნქციონირებს სამი ლაბორატორია:
- ტყის ბიომრავალფეროვნების, დაგეგმარებისა და ექსპერტიზის ლაბორატორია
- ტყის აღდგენისა და სატყეო მელიორაციის ლაბორატორია
- ტყის დაცვის განყოფილების ლაბორატორია