საბუნებისმეტყველო მეცნიერებების და ბიოტექნოლოგიის სკოლა

მევენახეობა-მეღვინეობის საბაკალავრო პროგრამის აღწერა

საქართველოს აგრარული უნივერსიტეტის მევენახეობა-მეღვინეობის საბაკალავრო პროგრამა უნიკალურია საქართველოში, რამდენადაც ღვინის დამზადების სრულ პროცესს მოიცავს: ვენახის გაშენებიდან, ღვინის ჩამოსხმისა და მარკეტინგის ჩათვლით.

პროგრამის მიზანს წარმოადგენს მომზადდეს კურსდამთავრებული, რომელიც წარმატებულად გაართმევს თავს, როგორც თეორიულ, ისე პრაქტიკულ საქმიანობას. მას ექნება თანამედროვე მოთხოვნების შესაბამისი ცოდნა და პროფესიული უნარები. კურსდამთავრებულს ეცოდინება, როგორც საქართველოში, ასევე მსოფლიო მევენახეობისა და მეღვინეობის დარგის ზოგადი საფუძვლები, ვაზის გავრცელებული ძირითადი ჯიშები, მათი გაშენების, აღზრდა-ფორმირების, კულტივირების აგროტექნიკური წესები და ნორმები, ასევე ბიოლოგიური და ეკოლოგიური ასპექტები. ეცოდინება, როგორც კლასიკური მეთოდით ღვინის დაყენება, ასევე სხვა ძირითადი ტექნოლოგიები.

ინგლისურ ენასთან ერთად, სტუდენტი შეისწავლის მეღვინეობის სპეციალობისათვის მნიშვნელოვან ფრანგულ ენას, რომელიც დაეხმარება მას თანამედროვე ტექნოლოგიური მიღწევების გაცნობა–ათვისებაში.

მევენახეობა-მეღვინეობის საბაკალავრო პროგრამა შემუშავებულია ვაშინგტონის (აშშ), კორნელისა (აშშ) და კალიფორნიის (აშშ) უნივერსიტეტების შესაბამისი პროგრამების საფუძველზე და მორგებულია ქართულ რეალობასა და ტრადიციებს.

საბაკალავრო პროგრამის წარმატებით დასრულების შემთხვევაში, კურსდამთავრებულს ენიჭება კვალიფიკაცია - აგრარულ მეცნიერებათა ბაკალავრი. საბაკალავრო პროგრამის ხანგრძლივობაა 4 წელი.

ქმედებაზე დაფუძნებული სწავლება

მევენახეობა-მეღვინეობის საბაკალავრო პროგრამით გათვალისწინებული კრედიტების (240 კრედიტი) დაახლოებით მესამედი ეთმობა ლაბორატორიული და/ან პრაქტიკული მეცადინეობების შემცველ საგნებს. შესაბამისად, სწავლების მნიშვნელოვანი დრო ლაბორატორიულ მეცადინეობებს ეთმობა და ეფუძნება ქმედებაზე დაფუძნებულ სწავლებას (learning-by-doing). ეს გულისხმობს, რომ სტუდენტები პროფესიას ეუფლებიან ინდივიდუალური მუშაობის გზით და საკუთარი ხელით აკეთებენ ამოცანას, ცდას, ანალიზს.

კახა ბენდუქიძის კამპუსში ყოველ წელს ტარდება სტუდენტური ღვინის ფესტივალი, რომელსაც ესწრებიან უნივერსიტეტის აკადემიური პერსონალი, ღვინის სპეციალისტები, ღვინის კომპანიები, ღვინის სააგენტოს წარმომადგენლები. ისინი სტუდენტების ღვინოებს ეცნობიან და ცალკეული კომპონენტების მიხედვით აფასებენ.

სტუდენტური ღვინის ფესტივალი მევენახეობა-მეღვინეობის საბაკალავრო პროგრამის პრაქტიკული სწავლების ნაწილია. მე-4 კურსის სტუდენტები „მიკროვინიფიკაციისა და ღვინის ფესტივალის სიმულაციის“ საგნის ფარგლებში უნივერსიტეტის მევენახეობა-მეღვინეობის აკადემიასა და მარანში ამზადებენ თავიანთ საავტორო ღვინოებს (სავალდებულოა დააყენონ წითელი და თეთრი ღვინოები, როგორც ქვევრის, ასევე კლასიკური), რომლებიც წარმოადგენენ მათი დამოუკიდებელი მუშაობის შედეგს.

სტუდენტები თავად არჩევენ ყურძნის ჯიშსა და ტექნოლოგიას, კრეფენ ყურძენს, ახდენენ ტკბილისა და დურდოს წინასწარ დამუშავებას, ალკოჰოლური დუღილის წარმართვასა და რეგულირებას, ვაშლ-რძემჟავა დუღილის ჩატარებასა და დაავადებების პრევენციას. ამასთანავე, საზღვრავენ ღვინის ფიზიკურ-ქიმიურ პარამეტრებს, ხარისხის შეფასების მიზნით ატარებენ დეგუსტაციებს, ამოწმებენ მდგრადობას, ზრუნავენ ღვინის სტაბილიზაციაზე და ასხამენ ბოთლებში.

ამასთან, სტუდენტები სწავლობენ მეღვინეობის ქვეყნების, რეგიონების, ყურძნის ჯიშების, ტექნოლოგიების წარდგენას/პრეზენტაციას. დეგუსტაციის ნაწილში სინჯავენ, აფასებენ და აღწერენ როგორც ქართულ, ასევე სხვადასხვა ქვეყნის ღვინოებს.

„ღვინის მარკეტინგის“ საგნის ფარგლებში კი საქართველოს აგრარული უნივერსიტეტის მევენახეობა-მეღვინეობის პროგრამის სტუდენტები თბილისის თავისუფალი უნივერსიტეტის ვიზუალური ხელოვნებისა და დიზაინის პროგრამის სტუდენტებთან ერთად ქმნიან ეტიკეტის დიზაინს და წარუდგენენ მომხმარებელს.

დასაქმების სფეროები

მევენახეობა-მეღვინეობის საბაკალავრო პროგრამის კურსდამთავრებულის დასაქმების სფერო მრავალფეროვანია, მათ შორის:

• ღვინის მწარმოებელი კომპანიები
• ღვინის ლაბორატორიები
• მცირე ფერმერული მეურნეობები
• მევენახეობა-მეღვინეობის მიმართულების საკონსულტაციო კომპანიები
• შესაბამისი პროფილის არასამთავრობო ორგანიზაციები და საერთაშორისო პროექტები

პროგრამის აღწერა