ვაშლის, შავქლიავას და ატმის ნიმუშებიდან გამოიყო ლაქტობაქტერიების და საფუვრების 110 იზოლატი. კოლექცია ინახება საქართველოს აგრარული უნივერსიტეტის ს. დურმიშიძის ბიოქიმიისა და ბიოტექნოლოგიის ინსტიტუტში
დადგინდა რომ, pH 2.0-ზე კარგი ზრდით გამოირჩეოდა ჩხირის ფორმის 6 იზოლატი. ნაღვლის მარილების სხვადასხვა კონცენტრაციის მიმართ ტოლერანტობის შესწავლისას 0.3%-ზე გაიზარდა ყველა იზოლატი, 0.5%-ზე – 8, ხოლო 1%-ზე – ნაზრდი არ დაფიქსირდა;
ოთხმა შტამმა აჩვენა Salmonella enterica ATCC 14028-სა და Staphylococcus aureus ATCC 25923-ის მიმართ ინჰიბიტორული მოქმედება. LAB იზოლატები ყველაზე მაღალი ზრდის დათრგუნვით გამოირჩეოდნენ Proteus mirabilis ATCC 12453-სა და Shigella flexneri -ის ATCC12022 წინააღმდეგ;
შერჩეული 10 იზოლატის ანტიბიოტიკური მგრძნობელობის ტესტმა აჩვენა, რომ ყველა იზოლატი რეზისტენტული აღმოჩნდა ციპროფლოქსაცინის, ვანკომიცინის და ნალიდიქსის მჟავას მიმართ, ხოლო ზოგიერთი იზოლატი რეზისტენტული იყო ტეტრაციკლინის, სტრეპტომიცინის და კანამიცინისადმი;
იზოლატების იდენტიფიკაცია განხორციელდა 16S რიბოსომული დნმ-ით და სახეობა-სპეციფიკური პჯრ-ით. იზოლატები მიეკუთვნებოდა Lactobacillus plantarum-ის და Lactobacillus casei-ის სახეობებს;
მორფოლოგიური (მიკროსკოპირება), ფიზიოლოგიური (ტემპერატურა, ზრდის ინტენსივობა), ბიოქიმიური (შაქრების ფერმენტაცია, კატალაზას ტესტი) და პრობიოტიკური თვისებების (pH 2.0-ზე ზრდა, ნაღვლის მჟავების მიმართ ტოლერანტობა, ანტიბიოტიკებისადმი რეზისტენტობა, ანტიმიკრობული აქტივობა პათოგენური ბაქტერიების მიმართ) საფუძველზე შეირჩა 4 შტამი; ატმის და შავქლიავას წვენების ფერმენტაციისთვის შეიქმნა 2 კონსორციუმი (კონსორციუმი I: Lactobacillus casei G91 + Lactobacillus plantarum G99 და კონსორციუმი II: Lactobacillus casei G51 + Lactobacillus plantarum G101);
ატმის (კონსორციუმი I, კონსორციუმი II) და შავქლიავას (კონსორციუმი II) პრობიოტიკური წვენების შენახვის ვადად განისაზღვრა 21 დღე, რძემჟავა ბაქტერიების ტიტრით 2.4×108±0.07 კწე/მლ, 3.0×107±0.09 კწე/მლ, 5.0×107±0.12 კწე/მლ, შესაბამისად. შავქლიავას კონსორციუმ I-ით (Lactobacillus casei G91 + Lactobacillus plantarum G99) ფერმენტირებული წვენის შენახვის ვადად განისაზღვრა 35 დღე, რძემჟავა ბაქტერიების ტიტრით 1.8×107±0.06 კწე/მლ;
შავქლიავას წვენებში საერთო შაქრების შემცველობა კონსორციუმი I-ის გავლენით 132±3.05 გ/ლ-იდან შემცირდა 110±2.12 გ/ლ-ამდე, ხოლო კონსორციუმი II-ით დაიკლო 116.2±2.48 გ/ლ-ამდე. ატმის წვენში კონსორციუმ I-ით ფერმენტაციის შედეგად საერთო შაქრების შემველობა 116±2.02 გ/ლ-იდან შემცირდა 88.5±2.15 გ/ლ-ამდე, კონსორციუმ II-ით - 84±2.18 გ/ლ-ამდე, 4˚C-ზე შენახვიდან 35-ე დღეს;
წვენებში შაქრების რაოდენობის შემცირებასთან ერთად გაიზარდა ორგანული მჟავების კონცენტრაცია. შავქლიავას წვენში რძემჟავას შემცველობა 0.23±0.04 გ/ლ-იდან კონსორციუმი I-ით 3 დღიანი ფერმენტაციის შემდეგ გაიზარდა 12.8±0.12 გ/ლ-ამდე, კონსორციუმი II-ით - 9.6±0.11 გ/ლ-ამდე. ატმის წვენში კონსორციუმი I-ით 0.16±0.04 გ/ლ-იდან გაიზარდა 9.6±0.09 გ/ლ-ამდე, კონსორციუმი II-ით კი - 8.4±0.12 გ/ლ-ამდე;
წვენები მდიდარია ფენოლების შემცველობით (395.52±21.78 მგ/ლ, 370.81±18.45 მგ/ლ, 310.41±24.58 მგ/ლ) და ხასიათდება მაღალი ანტიოქსიდანტური აქტივობით (103.57±13.37 მგ AAE/ლ, 140.62±14.80 მგ AAE/ლ, 107.51±14.80 მგ AAE/ლ);
კონსორციუმი I-ით ფერმენტირებულ შავქლიავას წვენის ნიმუშში, 21 დღეში ჯამური ფენოლების რაოდენობამ მოიმატა დაახლოებით 2.5-ჯერ, ხოლო 35 დღეს, საწყისთან შედარებით 4.5-ჯერ. ფერმენტირებულ შავქლიავას წვენში 35-ე დღეს ჯამური ფენოლების შემცველობა დაახლოებით 2.5-ჯერ აღემატებოდა იმავე პერიოდში ატმის ფერმენტირებულ წვენში არსებულ ფენოლებს;
არაფერმენტირებულ შავქლიავას წვენში ანტიოქსიდანტური აქტივობა შეადგენდა 233.31±8.7 მგ AAE/ლ-ს, რომელიც ეტაპობრივად შემცირდა კონსორციუმებით მოქმედების შედეგად. შედარებით მაღალი მაჩვენებელი დაფიქსირდა თერმოსტატში 3-დღიანი ფერმენტაციის შემდეგ. რაც შეეხება ატმის წვენს, კონსორციუმი I-ით ფერმენტირებულ ვარიანტში 131.23±7.2 მგ AAE/ლ-იდან გაორმაგდა 262.47±12.8 მგ AAE/ლ-ამდე, სამაცივრე პირობებში კი საგრძნობლად შემცირდა. მიმდინარე კვლევამ გამოავლინა წვენების დუღილის პოტენციალი რძემჟავა შტამების გამოყენებით არარძის ფუნქციური სასმელების წარმოებისთვის;
მიმდინარე კვლევამ გამოავლინა წვენების დუღილის პოტენციალი რძემჟავა შტამების გამოყენებით არარძის ფუნქციური სასმელების წარმოებისთვის, რომლებიც შეიძლება გამოყენებულ იქნას ადამიანთა ფართო სპექტრისთვის, მათ შორის, ლაქტოზის მოუნელებლობის მქონე ადამიანების, ვეგეტარიანელებისა და ვეგანებისთვის;
მიღებულ შედეგებზე დაყრდნობით უპირატესობა მიენიჭა კონსორციუმი I-ით ფერმენტირებულ შავქლიავას წვენს, რომელიც წარდგენილია საპატენტო განაცხადზე.
