ანა ქუმსიშვილი ESAVS-ის ონკოლოგიის პროგრამის გასავლელად მიემგზავრება ლუქსემბურგში

08 აპრილი 2025

Veterinarium-ის მთავარი ვეტერინარი და თერაპიის განყოფილების უფროსი, ანა ქუმსიშვილი, European School of Advanced Veterinary Studies-ის ონკოლოგიის საერთაშორისოდ აკრედიტებული პროგრამის გასავლელად ივნისის ბოლოს მიემგზავრება ლუქსემბურგში. პროგრამა მოიცავს 40-საათიან ინტენსიურ სწავლებას და შეესაბამება 5 კრედიტს.

კლინიკა Veterinarium-ის განვითარება წარმოადგენს საქართველოს აგრარული უნივერსიტეტის ერთ-ერთ პრიორიტეტს. კლინიკის წინსვლისთვის აუცილებელია ვეტერინარული სამედიცინო დარგების განვითარება, რაც კვალიფიციური კადრების გადამზადებით მიიღწევა. შესაბამისად, ანა ქუმსიშვილის გადამზადების ხარჯებს ფარავს საქართველოს აგრარული უნივერსიტეტი.

European School of Advanced Veterinary Studies-ის (ESAVS) სერტიფიცირებული და სამაგისტრო პროგრამები მოიცავს უახლეს სასწავლო კურსებს ვეტერინარულ კლინიკურ დისციპლინებში. სწავლება ემყარება ინტენსიურ თეორიულ და პრაქტიკულ მეცადინეობებსა და გამოცდებს. ESAVS-ის პროგრამები ტარდება ევროპული უნივერსიტეტებისა და კლინიკების ბაზაზე დაახლოებით 20 ქვეყანაში.

საერთაშორისო აღიარებული ლექტორები, პრობლემებზე ორიენტირებული მიდგომა, კლინიკური შემთხვევების დეტალური ანალიზი, ინტერაქტიული სწავლება, პრაქტიკული/ლაბორატორიული მეცადინეობები და პროგრამაზე შეზღუდული რაოდენობის მონაწილეები ხელს უწყობს ცოდნისა და უნარების ეფექტურ გადაცემას.

ESAVS-ის პროგრამები აკრედიტებულია ATF-ის (Akademie für tierärztliche Fortbildung) მიერ, რომელიც წარმოადგენს ვეტერინარული უწყვეტი განათლების აკადემიას და ფუნქციონირებს გერმანიის ფედერალური ვეტერინართა პალატის (Bundestierärztekammer - BTK) ფარგლებში. ATF-ის აკრედიტაცია შეესაბამება ვეტერინარული უწყვეტი განათლების ავტორიზებული კურსების რეესტრის (Registry of Approved Continuing Education – RACE, აშშ), ასევე სამეფო ვეტერინართა კოლეგიის (RCVS, დიდი ბრიტანეთი) და ირლანდიის ვეტერინართა საბჭოს (VCI) CE კრედიტების მოთხოვნებს.