რა გაკეთდა ვეტერინარიუმში ბოლო 1,5 წლის განმავლობაში

05 ივნისი 2025

რა გაკეთდა საქართველოს აგრარული უნივერსიტეტის კლინიკა ვეტერინარიუმში ბოლო 1,5 წლის განმავლობაში:

განახლებული ინფრასტრუქტურა და თანამედროვე აპარატურა 🩵✨

სრულად განახლდა კლინიკის ინფრასტრუქტურა, რაც მოიცავდა როგორც სარემონტო სამუშაოებს, ისე თანამედროვე სამედიცინო აპარატურის შესყიდვას. კლინიკის რეაბილიტაციასა და ტექნიკურ აღჭურვას მოხმარდა 260 000 აშშ დოლარზე მეტი, საიდანაც USAID-ის მხარდაჭერა დაახლოებით 140 000 დოლარს, ხოლო საქართველოს აგრარული უნივერსიტეტის ინვესტიცია კი 120 000 დოლარზე მეტს შეადგენდა
2025 წელს საქართველოს აგრარული უნივერსიტეტის მიერ ვეტერინარიუმის დამატებით თანამედროვე აპარატურით შესყიდვისთვის კიდევ განხორციელდა 145 000 აშშ დოლარის ინვესტიცია

კადრების პროფესიული გადამზადება 📚📋

2024-2025 წლებში საქართველოს აგრარული უნივერსიტეტის მიერ თანამშრომლების საზღვარგარეთ საერთაშორისო პროგრამებზე გადამზადებისათვის გამოიყო 20 000 აშშ დოლარამდე. კლინიკის ექიმები გადამზადებას/პრაქტიკას გადიან ამერიკის შეერთებულ შტატებში, იტალიაში, ლუქსემბურგში, ესპანეთში, პორტუგალიასა და ესტონეთში

სტრუქტურული ცვლილებები და რებრენდინგი ♾️🩵

კლინიკაში განხორციელდა სტრუქტურული ცვლილებები: ჩამოყალიბდა ქირურგიული და თერაპიული განყოფილებები, დაინიშნენ ახალი მთავარი ვეტერინარები და გუნდი დაკომპლექტდა ახალი წევრებით
კლინიკისთვის შეიქმნა ახალი ლოგო და შეირჩა სახელწოდება - ვეტერინარიუმი, რაც ლათინური ნეოლოგიზმია და დამკვიდრებულია როგორც ვეტერინარიის სამყაროს, ვეტერინართა ადგილის აღმნიშვნელი ცნება

დანერგილი ახალი სერვისები (არასრული სია)🐾🩻🧪

კლინიკაში დაინერგა მთელი რიგი ახალი მნიშვნელოვანი სერვისები, მათ შორის:

TPLO (Tibial Plateau Leveling Osteotomy) არის ქირურგიული პროცედურა, რომელიც გამოიყენება კატებსა და ძაღლებში ჯვარედინი იოგის გაწყვეტის სამკურნალოდ, რაც არის ერთ-ერთი ყველაზე გავრცელებული ორთოპედიული ტრავმა დიდ ჯიშებში. TPLO საერთაშორისოდ მიჩნეულია ოქროს სტანდარტად
ორთოპედიული ქირურგიის სხვა მთელი რიგი ოპერაციები (ოსტეოსინთეზი, იოგის პროთეზირება, დიდი წვივის ქედის ტრანსპოზიცია და სხვა)
ნეიროქირურგია (ხერხემლის ფიქსაცია, ხერხემლის დისკექტომია)
ლაპაროსკოპიული სტერილიზაცია
⁠ენდოსკოპიური პროცედურები: ბრონქოსკოპია, გასტროსკოპია, კოლონოსკოპია, ცისტოსკოპია, რინოსკოპოა, ოტოსკოპია, უცხო სხეულის ევაკუაცია
მუცლის ღრუს ულსტრასონოგრაფია (ექოსკოპია)
გულის ულტრასონოგრაფია (გულის სკრინინგი)
ახალი ლაბორატორიული კვლევები (C-რეაქტიული ცილა, გულის უკმარისობის მარკერი, D-დიმერი, კორტიზოლი, პანკრიასული ლიპაზა, პროგესტერონი, გლიკოჰემოგლობინი, თირეოიდული ჰორმონები, სისხლის თავსებადობის ტესტი და სხვა)

კლინიკის როლი განათლებასა და კვლევაში 🎓📊

გაიზარდა კლინიკის ჩართულობა საქართველოს აგრარული უნივერსიტეტის ვეტერინარული მედიცინის სკოლის საგანმანათლებლო პროგრამების სასწავლო და კვლევით პროცესებში, მაგალითისთვის:

განხორციელდა ქირურგიული საგნების რეფორმა: განახლდა შინაარსი, სწავლების მეთოდები და პრაქტიკული მეცადინეობების ნაწილი ხორციელდება კლინიკაში
შემუშავდა ახალი საგანი „პრაქტიკა ვეტერინარულ კლინიკაში“ (დარგობრივი პრაქტიკა 1), რომლის ფარგლებში სტუდენტები პრაქტიკას გადიან კლინიკის როგორც თერაპიულ, ისე ქირურგიულ განყოფილებებში
განახლდა წვრილი ცხოველების შინაგანი მედიცინის კურსი, რომლის ფარგლებში პრაქტიკული მეცადინეობების ნაწილი ტარდება კლინიკაში
სტუდენტებს, სურვილის შემთხვევაში და შეთანხმებით, შესაძლებლობა აქვთ დაესწრონ საინტერესო ქირურგიულ ოპერაციებს
სადოქტორო პროგრამის სტუდენტებს შესაძლებლობა აქვთ კლინიკის დახმარებით განახორციელონ თავიანთი კვლევა

პირველად საქართველოში - ვეტერინარიუმში🔥

საქართველოში პირველად სწორედ ვეტერინარიუმში ჩატარდა ისეთი შთამბეჭდავი ოპერაციები, როგორებიცაა:

კიდურის პროტეზირება - Intraosseous Transcutaneous Amputation Prosthesis (ITAP)
კვირისტავის ჭაღის ენდოპროტეზირება - Patellar Groove Replacement (PGR), ასევე ბარძაყის და დიდი წვივის სოლისებური ძვალკვეთის მეთოდით დეფორმაციების კორექცია
კისრის 6-7 მალების სპონდილოდეზი - ოპერაცია ჩატარდა თანამედროვე მასალებით (პოლიეთერეთერკეტონის (PEEK) კისრის ქეიჯი და ტიტანის ფირფიტა), დიაგნოზი: Wobbler Syndrome

სწორედ ამიტომ ჩვენ ვეტერინარიუმს ვხედავთ როგორც ვეტერინარული მედიცინის კონგლომერატს, რომელიც აერთიანებს სერვისებს, განათლებასა და კვლევას 🩵 ამჟამად, ონკოლოგიისა და კარდიოლოგიის მიმართულებების განვითარებაზე ვმუშაობთ.