აგრონომიისა და ლანდშაფტის მენეჯმენტის სკოლა

აგრონომიის საბაკალავრო პროგრამის აღწერა

საქართველოს აგრარული უნივერსიტეტის აგრონომიის საბაკალავრო პროგრამის მიზანს წარმოადგენს მომზადდეს აგრონომიის ბაკალავრი, რომელსაც ექნება თანამედროვე მოთხოვნების შესაბამისი თეორიული ცოდნა და პროფესიული უნარები. ეცოდინება საქართველოში და მსოფლიოში გავრცელებული ძირითადი სასოფლო-სამეურნეო კულტურები, მათი კულტივირების აგროტექნიკური წესები და ნორმები, ასევე ბიოლოგიური და ეკოლოგიური ასპექტები.

პროგრამის ფარგლებში სტუდენტი ისწავლის საქართველოში და მსოფლიოში გავრცელებული სასოფლო-სამეურნეო კულტურების წარმოშობასა და ბიოლოგიას; ნიადაგის ტიპებს, მათ ძირითად მახასიათებლებსა და დამუშავების მეთოდებს; ნიადაგის ნაყოფიერების მართვას; მცენარეთა მავნებლებსა და დაავადებებს, მათთან ბრძოლის საშუალებებს; მეხილეობის, მებოსტნეობის, მევენახეობისა და ორგანული სოფლის მეურნეობის საფუძვლებს, გაეცნობა მცენარეთა ახალი ჯიშებისა და ჰიბრიდების გამოყვანის თანამედროვე მეთოდებს.

აგრონომიის საბაკალავრო პროგრამა შედგენილია Michigan State University-ს (აშშ), Universuty of Kassel (გერმანია) და University of Natural Resources and Life Sciences-ის (ავსტრია) მსგავსი პროგრამების ანალიზის საფუძველზე.

საბაკალავრო პროგრამის წარმატებით დასრულების შემთხვევაში, კურსდამთავრებულს ენიჭება კვალიფიკაცია - აგრონომიის ბაკალავრი. საბაკალავრო პროგრამის ხანგრძლივობაა 4 წელი.

ქმედებაზე დაფუძნებული სწავლება

პროგრამა მოიცავს აგროპროექტს, რომლის ფარგლებშიც სტუდენტებს უნივერსიტეტში მიღებული თეორიული და პრაქტიკული ცოდნის საფუძველზე დამოუკიდებლად მოჰყავთ სხვადასხვა ერთწლიანი სასოფლო-სამეურნეო კულტურა. ამისათვის კახა ბენდუქიძის კამპუსში საირიგაციო სისტემით აღჭურვილი სადემონსტრაციო ნაკვეთი მოეწყო, რათა სტუდენტებს საშუალება ჰქონდეთ დააკვირდნენ ერთწლიანი კულტურების სრულ სავეგეტაციო ციკლს.

აგროპროექტის ფარგლებში სტუდენტებს მოსავალი მოჰყავთ ყველა აგროწესის დაცვით, რაც გულისხმობს ნაკვეთის დამუშავებას, რისკების შეფასებას, ბიუჯეტირებას, ნიადაგის ანალიზს, ნაყოფიერების მართვის გეგმის შემუშავებას, თესვას, მავნებლებსა და დაავადებებზე დაკვირვებას და შესაბამისი ბრძოლის ღონისძიებების გატარებას, მოსავლის აღება-დაბინავებას, რაოდენობრივი და ხარისხობრივი მაჩვენებლების განსაზღვრას.

სტუდენტები აგროპროექტის მიმდინარეობის დროს თავად არიან ჩართულნი, როგორც საველე, ასევე ლაბორატორიულ სამუშაოებში. აგროპროექტის დასაწყისში სტუდენტები თავად ირჩევენ სასურველ კულტურებს და ნაწილდებიან შესაბამის ნაკვეთში (მაგალითად: კიტრი, პომიდორი, ბადრიჯანი, ტკბილი წიწაკა, სიმინდი, ნესვი, საზამთრო, კარტოფილი).

სწავლების მნიშვნელოვანი დრო ლაბორატორიულ მეცადინეობებს ეთმობა და ეფუძნება ქმედებაზე ორიენტირებულ სწავლებას (learning-by-doing). ეს გულისხმობს, რომ თითოეულ სტუდენტს ინდივიდუალური სამუშაო ადგილი აქვს თანამედროვედ აღჭურვილ ლაბორატორიებში და დამოუკიდებლად, თავისი ხელით უწევს ექსპერიმენტის/ცდის/ანალიზის ჩატარება. ლაბორატორიული მეცადინეობისას სტუდენტთა ჯგუფები არ უნდა აღემატებოდეს 20 ადამიანს. ეს, თავის მხრივ, დადებითად აისახება სტუდენტების სწავლის შედეგებზე.

დასაქმების სფეროები

აგრონომიის საბაკალავრო პროგრამის კურსდამთავრებულს აქვს ფართო დასაქმების არეალი, კერძოდ: სასათბურე ფერმერული მეურნეობები, აგროსაკონსულტაციო ცენტრები/კომპანიები, კვლევითი ინსტიტუტები და შესაბამისი პროფილის ლაბორატორიები, სასოფლო-სამეურნეო პროდუქტთა გადამამუშავებელი კომპანიები, აგრარული არასამთავრობო ორგანიზაციები თუ საერთაშორისო პროექტები. გარდა ამისა, კურსდამთავრებულს შეეძლება თავად დააფუძნოს ფერმერული მეურნეობა.

პროგრამის აღწერა