საინჟინრო ტექნოლოგიის სკოლა

მექანიკის ინჟინერიის საბაკალავრო პროგრამის აღწერა

საქართველოს აგრარული უნივერსიტეტის მექანიკის ინჟინერიის საბაკალავრო პროგრამის მიზანია მოამზადოს მექანიკის ინჟინერიის ბაკალავრი, რომელსაც ექნება ფართო ცოდნა: მანქანათა მექანიკაში, მექატრონიკაში, ავტომობილების, შიგაწვის ძრავების, ავტომატიზებული კომპლექსების, ჰიდრავლიკური სისტემების, მანქანათა ნაწილების გაანგარიშების ზოგად მეთოდიკებში.

კურსდამთავრებული შეიძენს ცოდნას მექანიკის ინჟინერიაში გამოყენებული მასალებისა და საწარმოო პროცესების შესახებ. მას ექნება საინჟინრო უნარ-ჩვევები, რომელიც დაეხმარება საინჟინრო დარგში არსებული ამოცანებისა და პრობლემების გადაჭრაში.

მექანიკის ინჟინერიის საბაკალავრო პროგრამა ოპტიმალურად არის დაკომპლექტებული ზოგად საინჟინრო და სპეციალობის დისციპლინებით. პროგრამის კომპონენტები და მათი ერთობლიობა უზრუნველყოფს სწავლის შედეგების მიღწევას და კურსდამთავრებულთა კონკურენტუნარიანობას შრომის ბაზარზე.

სტუდენტები შეისწავლიან მანქანებისა და მოწყობილობების ეფექტიანად გამოყენების პრინციპებს, გააცნობიერებენ საინჟინრო დარგში არსებულ პრობლემას და მათი გადაჭრის გზებსა და მეთოდებს. ასევე, შეისწავლიან საინჟინრო ტექნოლოგიებს და მათ მახასიათებლებს, კომპიუტერული  და მათემატიკური მეთოდების, CAD/CAM სისტემების გამოყენებას საინჟინრო საქმიანობაში. სტუდენტს შეეძლება სხვადასხვა მექანიკური სისტემის დაპროექტება, მიღებული ცოდნის გამოყენება პრობლემების გადასაწყვეტად, პროექტების მომზადება და განხორციელება, პროექტებისათვის საჭირო რესურსების განსაზღვრა.  პროგრამის წარმატებით დასრულების შემდეგ სტუდენტი შეძლებს მანქანებისა და მოწყობილობების შექმნას, დაპროექტებას, მოდერნიზებას და ექსპლუატაციას.

საბაკალავრო პროგრამის წარმატებით დასრულების შემთხვევაში, კურსდამთავრებულს ენიჭება კვალიფიკაცია - მექანიკის ინჟინერიის ბაკალავრი. საბაკალავრო პროგრამის ხანგრძლივობაა 4 წელი.

ქმედებაზე დაფუძნებული სწავლება

მექანიკის ინჟინერიის საბაკალავრო პროგრამით გათვალისწინებული კრედიტების (240 კრედიტი) დაახლოებით ნახევარი ემსახურება პროფესიული პრაქტიკული უნარების განვითარებას. პროგრამა დატვირთულია ლაბორატორიული და პრაქტიკული მეცადინეობებით. ლაბორატორიული და პრაქტიკული მეცადინეობები მიმდინარეობს ქმედებაზე დაფუძნებული სწავლების მეთოდის (learning-by-doing) გამოყენებით, რაც ნიშნავს რომ სტუდენტები ეუფლებიან პროფესიას ინდივიდუალურად მუშაობის გზით და საკუთარი ხელით ასრულებენ პრაქტიკულ დავალებას/ამოცანას. გარდა ამისა, პრაქტიკული/ლაბორატორიული მეცადინეობისას სტუდენტთა ჯგუფები არ უნდა აღემატებოდეს 20 ადამიანს. ეს, თავის მხრივ, დადებითად აისახება სტუდენტების სწავლის შედეგებზე.

დასაქმების სფეროები

მექანიკის ინჟინერიის საბაკალავრო პროგრამის დასრულების შემდეგ, კურსდამთავრებულს შეეძლება დასაქმდეს:

• ყველა იმ ორგანიზაციაში, რომელშიც გამოიყენება ავტომატიზებული ელექტრო-მექანიკური ხაზები და დანადგარები
• შესაბამისი პროფილის ორგანიზაციებში
• საგანმანათლებლო და კვლევით დაწესებულებებში

პროგრამის აღწერა