აგრარული უნივერსიტეტის სტუდენტების საავტორო ღვინოები „ახალი ღვინის ფესტივალზე“

საქართველოს აგრარული უნივერსიტეტის მევენახეობა-მეღვინეობის საბაკალავრო პროგრამის სტუდენტებმა თავიანთი საავტორო ღვინოები წარადგინეს „ახალი ღვინის ფესტივალზე“, რომელიც 13 მაისს მთაწმინდის პარკში გაიმართა.

აგრარული უნივერსიტეტის მევენახეობა-მეღვინეობის საბაკალავრო პროგრამის მე-4 კურსის სტუდენტები მიკროვინიფიკაციისა და ღვინის ფესტივალის სიმულაციის საგნის ფარგლებში უნივერსიტეტის მარანში ამზადებენ თავიანთ საავტორო ღვინოებს (სავალდებულოა დააყენონ წითელი და თეთრი ღვინოები, როგორც ქვევრის, ასევე კლასიკური), რომლებიც წარმოადგენენ მათი დამოუკიდებელი მუშაობის შედეგს.

სტუდენტები თავად არჩევენ ყურძნის ჯიშსა და ტექნოლოგიას, კრეფენ ყურძენს, ახდენენ ტკბილისა და დურდოს წინასწარ დამუშავებას, ალკოჰოლური დუღილის წარმართვასა და რეგულირებას, ვაშლ-რძემჟავა დუღილის ჩატარებასა და დაავადებების პრევენციას. ამასთანავე, საზღვრავენ ღვინის ფიზიკო-ქიმიურ პარამეტრებს, ხარისხის შეფასების მიზნით ატარებენ დეგუსტაციებს, ამოწმებენ გაწებვას, ზრუნავენ ღვინის სტაბილიზაციაზე და ასხამენ ბოთლებში.

ღვინის მარკეტინგის საგნის ფარგლებში აგრარული უნივერსიტეტის მევენახეობა-მეღვინეობის სტუდენტები თავისუფალი უნივერსიტეტის ვიზუალური ხელოვნებისა და დიზაინის სტუდენტებთან ერთად ქმნიან ეტიკეტის დიზაინს და წარუდგენენ მომხმარებელს.