სტუდენტური ღვინის ფესტივალი

კახა ბენდუქიძის კამპუსში სტუდენტური ღვინის ფესტივალი ჩატარდა. სტუდენტური ღვინის ფესტივალი აგრარული უნივერსიტეტის მევენახეობა-მეღვინეობის საბაკალავრო პროგრამის დამამათავრებელი კურსის ნაწილია.

სტუდენტები უნივერსიტეტის მევენახეობა-მეღვინეობის აკადემიაში, ღვინის თანამედროვე და ტრადიციულ მარნებში ამზადებენ თავიანთ საავტორო ღვინოებს, რომლებიც წარმოადგენენ სტუდენტების დამოუკიდებელი მუშაობის შედეგს. მევენახეობა-მეღვინეობის პროგრამის სტუდენტების ღვინოების ეტიკეტს პროგრამის სტუდენტებთან ერთად ქმნიან თავისუფალი უნივერსიტეტის ვიზუალური ხელოვნების, არქიტექტურისა და დიზაინის პროგრამის - VA[A]DS-ის სტუდენტები.

სტუდენტური ღვინის ფესტივალისას უნივერსიტეტის აკადემიური პერსონალი, ღვინის სპეციალისტები, ღვინის ეროვნული სააგენტოსა და ღვინის კომპანიების წარმომადგენლები გაეცნენ სტუდენტების ღვინოებს და შეაფასეს ცალკეული კომპონენტების მიხედვით.

გამოვლინდა გამარჯვებული შემდეგ ნომინაციებში:
- საუკეთესო თეთრი ღვინო
- საუკეთესო წითელი ღვინო
- საუკეთესო ქვევრის ღვინო
- საუკეთესო მარკეტინგული კონცეფცია
- საუკეთესო კომუნიკაცია-პრეზენტაცია

სტუდენტები თვითონ არჩევენ ყურძნის ჯიშსა და ტექნოლოგიას, მართავენ ღვინის შექმნისათვის საჭირო ყველა პროცესს, ამუშავებენ ღვინის კონცეფციას და დასაგემოვნებლად წარუდგენენ მომხმარებელს.