თაია კოტორაშვილი კატალონიის პოლიტექნიკურ უნივერსიტეტში კვლევითი მივლინებით იმყოფებოდა

საქართველოს აგრარული უნივერსიტეტის საბუნებისმეტყველო მეცნიერებების სამაგისტრო პროგრამის (ქიმიის მიმართულება) მეორე კურსის სტუდენტი თაია კოტორაშვილი კვლევითი მივლინებით იმყოფებოდა კატალონიის პოლიტექნიკურ უნივერსიტეტში (UPC - Universitat Politècnica de Catalunya).

ის ჩართული იყო UPC-ის ქიმიური ინჟინერიის დეპარტამენტის კვლევაში, სადაც პროფესორი ჯორდი პუიჯალის ხელმძღვანელობით განახორციელა მის მიერ დასინთეზებული ახალი კატიონური თანაპოლიმერების სტრუქტურის კვლევა 1H ბმრ სპექტროსკოპიით, ასევე, მოლეკულური მასების განსაზღვრა გელშეღწევადი ქრომატოგრაფიით (GPC).

თაია საქართველოს აგრარული უნივერსიტეტის ქიმიისა და მოლეკულური ინჟინერიის ინსტიტუტში მუშაობს პროექტზე: „წამლის გადამტანი დისპერსიული და ბაქტერიციდული სისტემები კატიონური ფსევდოპროტეინების საფუძველზე.“ პროექტი ფინანსდება შოთა რუსთაველის ეროვნული სამეცნიერო ფონდის გრანტის ფარგლებში.

ასევე, თაია არის საქართველოს აგრარული უნივერსიტეტის ქიმიის საბაკალავრო პროგრამის კურსდამთავრებული.