თენგიზ და თემურ ქანთარიებმა გააკეთეს მოხსენებები ავსტრიაში საერთაშორისო კონგრესზე

საქართველოს აგრარული უნივერსიტეტის მეცნიერებმა, ქიმიის დოქტორებმა თენგიზ და თემურ ქანთარიებმა თავიანთი მიმდინარე კვლევების შესახებ გააკეთეს მოხსენებები ავსტრიაში საერთაშორისო კონგრესზე - „4th International Congress on Advanced Materials Sciences and Engineering (AMSE-2023, Vienna, Austria, View Congress)“.

მულტიდისციპლინური კონგრესი მოწინავე მასალებისა და ტექნოლოგიების შესახებ ითვალისწინებდა 500-ზე მეტ მოხსენებას მსოფლიოს 30-ზე მეტი სხვადასხვა ქვეყნიდან.

თენგიზ ქანთარიას მოხსენება სახელწოდებით “New Degradable AB-type 1,2,3- Triazole Polyesters via ‘Click Chemistry” ეხებოდა ახალი დეგრადირებადი AB-ტიპის პოლიესტერების სინთეზს “კლიკ ქიმიის” გამოყენებით და მიღებული ბიომასალების სტრუქტურის, ხსნადობისა და დეგრადაციის შესწავლას, ხოლო თემურ ქანთარიას პრეზენტაცია სახელწოდებით “Dexamethasone loaded pseudo- protein nanoparticles for ocular drug delivery” იყო დექსამეთაზონით დატვირთული ნანო-ნაწილაკების შემუშავების შესახებ წამლის თვალში მიწოდებისათვის, კერძოდ, ის ეხებოდა პსევდოპროტეინული ნანო-ნაწილაკების წამლით დატვირთვის ეფექტიანობისა და წამლის გამოთავისუფლების კინეტიკის კვლევას.

თენგიზ და თემურ ქანთარიების კონგრესში მონაწილეობასთან დაკავშირებული ხარჯები დაფინანსებულია შოთა რუსთაველის საქართველოს ეროვნული სამეცნიერო ფონდის მიერ.