საბუნებისმეტყველო მეცნიერებების და ბიოტექნოლოგიის სკოლა

ბიოლოგიის საბაკალავრო პროგრამის აღწერა

საქართველოს აგრარული უნივერსიტეტის ბიოლოგიის საბაკალავრო პროგრამის მიზანს წარმოადგენს მოამზადოს ბიოლოგიის მეცნიერებათა ბაკალავრი, რომელსაც ექნება თანამედროვე მოთხოვნების შესაბამისი ცოდნა და პროფესიული უნარები, ეცოდინება ბიოლოგიური მეცნიერების სხვადასხვა ტრადიციული და ახალი დარგების შინაარსი და მიზნები, წარმოდგენა ექნება ბიოლოგიური კვლევების თანამედროვე მეთოდებზე, ტექნიკურ-ექსპერიმენტულ მიდგომებსა და მათი გამოყენების შესაძლებლობებზე. ასევე, ეცოდინება ბიოლოგიის გამოყენებითი დარგების, კერძოდ, ბიოტექნოლოგიისა და ბიომედიცინის საფუძვლები და გაცნობიერებული ექნება მათი დანიშნულება.

ბიოლოგიის საბაკალავრო პროგრამის ფარგლებში განსაკუთრებული მნიშვნელობა ენიჭება სტუდენტების პრაქტიკული უნარების გამომუშავებას. ეს საფეხურებად ხორციელდება, რათა სტუდენტები საბაკალავრო განათლების პროცესშივე ჩაერთონ თანამედროვე, საერთაშორისო დონის კვლევების განხორციელებაში.

პროგრამის თეორიული ნაწილი მოიცავს, როგორც ბიოლოგიის ტრადიციული დარგების ფართო სპექტრს მოლეკულური ბიოლოგიიდან ქცევის ბიოლოგიამდე, ისე ახალ დისციპლინებს, როგორიცაა: გენომიკა, ბიოინფორმატიკა და სხვა.

პროგრამის ასეთი სტრატეგიული სტრუქტურა ფართო თეორიული განათლების და ინტენსიური ექსპერიმენტული წვრთნის მჭიდრო ურთიერთკავშირის საფუძველზე საშუალებას აძლევს კურსდამთავრებულებს უპრობლემოდ ჩაერთონ სამეცნიერო კვლევაში და განახორციელონ თავისი სამომავლო მიზნები, როგორც ჩვენი ქვეყნის, ისე ევროპისა და ამერიკის წამყვან საკვლევ ინსტიტუტებსა და უნივერსიტეტებში.

ოთხწლიანი კურსის დასრულების შემდეგ, კურსდამთავრებულები ფუნდამენტური თეორიული ცოდნის გარდა, ფლობენ მნიშვნელოვან კონკრეტულ უნარებს, როგორიცაა: თანამედროვე ხელსაწყოებთან მუშაობის უნარი, კვლევების განხორციელება, ანალიტიკური აზროვნება და კონკრეტული ამოცანების გადაჭრის უნარი.

ბიოლოგიის მიმართულების გუნდი დაკომპლექტებულია მაღალკვალიფიციური პროფესიონალებით, მათ შორის პროფესორებით, რომელთაც გააჩნიათ ევროპის უნივერსიტეტებსა და საკვლევ ინსტიტუტებში მუშაობის მრავალწლიანი გამოცდილება და რომელთა კვლევის შედეგები რეგულარულად იბეჭდება ევროპისა და ამერიკის ცნობილ ჟურნალებსა და გამომცემლობებში. პროფესორების უმეტესობა სწავლების პარალელურად უშუალოდ და აქტიურად არის ჩართული კვლევებში, მათ შორის, მნიშვნელოვან საერთაშორისო პროექტებში, საქართველოს აგრარული უნივერსიტეტის სამეცნიერო ინსტიტუტების ინფრასტრუქტურაში. ეს შესაძლებლობას აძლევს სტუდენტებს ბაკალავრის საფეხურიდანვე ჩაერთონ სამეცნიერო კვლევებში სურვილის შემთხვევაში.

პროგრამის შემუშავებისას გათვალისწინებულ იქნა საერთაშორისო საუკეთესო გამოცდილება, კერძოდ, ბრემენის იაკობსის უნივერსიტეტისა და მიუნხენის ლუდვიგ მაქსიმილიანის უნივერსიტეტის შესაბამისი პროგრამები.

საბაკალავრო პროგრამის წარმატებით დასრულების შემთხვევაში, კურსდამთავრებულს ენიჭება კვალიფიკაცია - ბიოლოგიის ბაკალავრი. საბაკალავრო პროგრამის ხანგრძლივობაა 4 წელი.

ქმედებაზე დაფუძნებული სწავლება

ბიოლოგიის პროგრამით გათვალისწინებული კრედიტების (240 კრედიტი) დაახლოებით მესამედი ეთმობა ლაბორატორიული და/ან პრაქტიკული მეცადინეობების შემცველ საგნებს. შესაბამისად, სწავლების მნიშვნელოვანი დრო ლაბორატორიულ მეცადინეობებს ეთმობა და ეფუძნება ქმედებაზე დაფუძნებულ სწავლებას (learning-by-doing). ეს გულისხმობს, რომ სტუდენტები პროფესიას ეუფლებიან ინდივიდუალური მუშაობის გზით და საკუთარი ხელით აკეთებენ ამოცანას, ცდას, ანალიზს.

დასაქმების სფეროები

ბიოლოგიის საბაკალავრო პროგრამის კურსდამთავრებულს აქვს ფართო დასაქმების არეალი, მათ შორის:

• შესაბამის სამეცნიერო-კვლევით ორგანიზაციებში
• კლინიკური დიაგნოსტიკის ლაბორატორიებსა და კომპანიებში
• ჯანდაცვის სფეროში
• ფარმაკოლოგიურ და ფარმაცევტულ მრეწველობაში
• ბიოლოგიურ სოფლის მეურნეობაში
• ნაკრძალებში და სხვა დაცულ ტერიტორიებზე, ბოტანიკურ ბაღებში

ბიოლოგიის საბაკალავრო პროგრამის კურსდამთავრებულებს შესაძლებლობა აქვთ დასაქმდნენ სხვადასხვა უმაღლესი განათლებისა და ზოგადსაგანმანათლებლო დაწესებულებებში.

პროგრამის აღწერა