სურსათის უვნებლობის მენეჯმენტის სასერტიფიკატო პროგრამა

საქართველოს აგრარული უნივერსიტეტის სურსათის უვნებლობის მენეჯმენტის სასერტიფიკატო პროგრამის ფარგლებში თითოეულ სტუდენტს აქვს შესაძლებლობა თანამედროვე ინფრასტრუქტურულ სივრცეში თეორიულ ცოდნასთან ერთად, პრაქტიკული უნარები განივითაროს. 

პროგრამის პრაქტიკული ნაწილი ეფუძნება ქმედებაზე დაფუძნებულ სწავლებას (learning-by-doing), რაც გულისხმობს რომ ლაბორატორიული მეცადინეობებისას თითოეულ სტუდენტს ინდივიდუალური სამუშაო სივრცე აქვს და დავალებების დიდ ნაწილს საკუთარი ხელით ასრულებს ლექტორის მითითებების გათვალისწინებით. 

სურსათის უვნებლობის მენეჯმენტის ერთ-ერთი მნიშვნელოვანი საგანია სურსათის მიკრობიოლოგია, რომლის ფარგლებშიც დიდი დრო ეთმობა ლაბორატორიულ მეცადინეობებს, რათა სტუდენტები პრაქტიკულად დაეუფლონ სურსათის მიკრობიოლოგიური კვლევის ძირითად მეთოდებს. კერძოდ: 

• ტექნიკური რეგლამენტების მოთხოვნების შესაბამისად სხვადასხვა კატეგორიის სურსათის მიკრობიოლოგიური მაჩვენებლების განსაზღვრას 
• ⁠სასარგებლო მიკროორგანიზმების იდენტიფიცირებას 
• პირადი ჰიგიენის მიკრობიოლოგიურ შეფასებას 
• მიკროორგანიზმების მორფოლოგიური შესწავლის მეთოდებს.

მიღებული კომპეტენციები აუცილებელია სურსათის მიკრობიოლოგიური ხარისხისა და უვნებლობის შეფასების, პოტენციური მიკრობიოლოგიური დაბინძურების წყაროების იდენტიფიცირების, ჰიგიენური მოთხოვნების შესრულების მონიტორინგისა და ლაბორატორიული შედეგების ინტერპრეტაციისთვის.